Sa rainbow, bawat kulay ay may sariling ningning. Walang kailangang magtago o baguhin ang sarili para lang mag-fit in. Katulad ng mga beki na malakas ang dating, loud and proud silang rumampa, with confidence na winning!
Kung ito ay isang color palette, bright ang bawat shade na hatid ng Miss Q and A candidates sa August 11 episode ng "It's Showtime." Meet Heaven Jumawan, na head-turner ang beauty. Comedy naman ang forte ng comedy bar performer na si Senyora Acero Kabakal. Ibang 'amats' din ang baon ni Nadimunyo Lustre, na asset ang out-of-this-world na mga ngiti.
Pinuri ng hosts ang mala-anghel na ganda ni Heaven, who transitioned at the age of 14. Pero payo ni Vice Ganda, huwag kalimutan at huwag isantabi ang pag-aaral. Nangako naman si Heaven na babalik siya sa eskwela sa next academic year, matapos tumigil ng isang taon sa pag-aaral dahil sa problemang pinansyal.
Maya-maya pa, nagsimula na ang unang round, Tumpak Ganern, kung saan unang nakasagot si Heaven. At ang nakalaban ni Heaven sa Wit Lang? Eh, 'di si Nadimunyo!
Pinalakpakan ang talak ni Heaven sa tanong na, "Sino ang mas gusto mong nag-a-update sayo—jowa mo o NDRRMC?" Sagot niya, mas mahalaga ang update ng NDRRMC dahil kaligtasan ang priority.
Pero panggulat ang naging chukchak ni Nadimunyo sa tanong na, "Anong pipiliin mo—otsenta anyos ka na pero wala kang jowa, o may jowang otsenta anyos?" Short but sweet at impactful ang statement ni Nadimunyo. Sabi niya, mas pipiliin niya ang otsenta anyos na jowa dahil ang pag-ibig ay wala sa edad, kundi nasa realidad kung tatanggapin mo ang isang tao.
"Ang pagmamahal, puso ang dumidikta, bagamat minsan mata ang humuhusga," pahayag ni Nadimunyo, sabay "irap" kay Vice Ganda. Dahil sa talak niyang tumatak, si Nadimunyo ang kinoronahan bilang Miss Q and A Reyna Talak-Era of the day.
Good vibes at pag-asa ang hatid ng “It’s Showtime,” Lunes hanggang Sabado, 12 NN, sa ABS-CBN sa ALLTV2, GMA 7, A2Z, Kapamilya Online Live (KOL) at iWant.