.jpg)
Bandang alas-2 ng madaling araw nang magsimula ang sunog na umabot sa ikalawang alarma. Courtesy: Christopher Dawit via Christopher Sitson
MAYNILA — Nasa 12 pamilya o 36 indibidwal ang nawalan ng tirahan matapos sumiklab ang sunog sa isang residential area sa Dayap Street, Barangay Western Bicutan, Taguig, nitong Huwebes, September 17.
Bandang alas-2 ng madaling araw nang magsimula ang sunog na umabot sa ikalawang alarma.
Kanya-kanyang bitbit ng mga maisasalbang gamit ang mga residente.
May ilan namang piniling iwan na ang mga gamit para maisalba ang mga alagang aso’t pusa. Mayroon pang alagang rabbit ang naisalba.
Inabot nang dalawang oras bago tuluyang naapula ang sunog ng nasa 40 firetrucks mula sa BFP at fire volunteers.
Ayon sa residenteng si Dennis Guarino, pagkabalik niya sa kanyang bahay ay bigla na lang niyang napansin ang makapal na usok.
“Paglabas ko nun sinarado ko pa nga yung pinto eh. Tas nakipag kwentuhan lang ako sa labas. Pagbalik ko umuusok na agad. Kwarto ko na pala yung nasusunog. Hindi naman ako gumagamit ng kandila. Wala akong kuryente. Hindi ko rin alam saan nanggaling. Hindi naman ako nag sigarilyo,” paliwanag ni Guarino.
Muntik namang ma-trap sa kanilang bahay si Mary Ann Guarino kasama ang asawa na natutulog nang mangyari ang sunog.
“Sabi ko baba na! baba na! mamamatay tayong dalawa rito. Ayun tumakbo siya pababa. Binuhusan pa nila, wala na talagang pag-asa. Nagputukan na lahat ng wire, pumutok na yung tangke. Wala nang babalikan, tupok na yung taas, bagsak na yung second floor,” kwento ni Mary Ann.
Sa tala ng Taguig City Fire Station, nasa limang bahay ang natupok habang nasa 12 pamilya o 36 indibidwal ang apektado.
Dinala na ang ilan sa kanila sa evacuation center ng barangay at pinaabutan ng paunang tulong.
Patuloy pang iniimbestigahan ng Bureau of Fire Protection ang sanhi ng sunog.
KAUGNAY NA VIDEO